M.T. Magenga x Golden Maxxy
Mudhara Dhege akazvizama zverudo dzamara ati “hapana ukama apa”
Asi Mambo Guramatunhu vaingoti “handizvigoni zvekudetemba” vachinyepera Bella,
Golden Maxxy kungoraramawo hake nenyasha asi achimuda Nyasha,
RwaPaidashe rudo rwakarangaridza Magenga rudo rwashe nedzake nyasha,
Mai Emma ndivo vakapedza Shefu Mudhesve hutesve,
Hamutyinei akangofa achiti “kana wamutanga musikana”
Kuzoti zinyoka mugumbeze munongonzwa imi,
Kumbirai vamudzikamisa iye nekungwara ndokuvadzikamisa vasikana,
Marechera takamucherera vachena vamuchera.
Zhakata pakuyambuka ndipo paakasarira,
Akatarira vamwe vachiyambuka,
Chibadura akawororwa naJanet akakumbira mai ruregerero,
Chimbetu dzakamupedza mafuta nyaya dzerudo idzi,
Macheso ‘mbwa dzakamuruma nekuda kwaSarah,
Chimombe akazongoti siya waoneka rudo rwaoneka,
Matavire chakamupedza mochiziva imi.
Zvimoko zvaichemere boys dzesimoko,
Tazvida mukuda kuvapedza ndiye wakazopera,
Uyuwo Dembo wakafa achingodemba,
Nanhasi kwaari haazive akatanha ruva rake,
Achiri kungobvunza “Njiva yangu yatorwa naniko?”
Tozeza baba Tuku akafawo achikosora,
Kapuka kanonzi rudo kakadonhedza Dewa muchina muhombe,
Regai Madzibaba Zakaria vakazoti
“Zvinoda vaparidzi vaparidzire nyika”
Zverudo izvo hazvina shasha,
Soul Jah Luv akati “ndozvandinomudira”
Ndokusiwa pachena pamhene akati nyena.
Winky D mu garden akati ndo zheti vari two chete,
Na Mapfumo pana Madhebhura munoburana,
Killer T akatuka dzinza rose kuti imboko anyuramo murudo,
Tanto Wave pamuchinjikwa akazonanikwa,
JT akazongoti ndaka bhaizirwa big time,
Muchaiziva here ya Jah Prayzah naMaria yegore riya?
Enzol zvekutsva pasina tsvigiri wakati nikisi,
Bling4 achiti “kana love isina balance gara wasiya shamwari”
Tocky aitoti totanga dhudhu pachimuzaya chaanoda zvekuti dhu.
Zviri kwese, rudo haruzivi uri muRasta.
Akazvipedza chete ndi sister, brother naFata
Jahmiel wakati Not over you zvashata,
Vybz Kartel akati Come home, mwana arova marata,
Ndiani wakapindamo akasachemedzwa?
Aripo ati ndini, ini ndomurangaridza.
Mazvirokwazvo hama dai rwaityora makumbo,
Kutaura kuno tese tingadai tichigwesha,
Tezvara wani vakarurovera mukuwasha,
Andirevi nhema verengai rungano Ambuya Nemukwasha.
Zverudo musaite pikerere nazvo mafaro enyika haapere,
Bhuru rinorwa rinoonekwa nemavanga asi mamwe haazopore,
Musazomamanyira manhanga pakukwata regai apore,
Zvekuda kunzi ndimi matanga zvine ngozi,
Mjolo makuruwani pakuyeredzesa pwere neharahwa misodzi.
♡Sir M.T. Magenga
♤Poetic_Minds
0779 888 048
Golden Maxxy
+263783281546